Është mbajtur sot seanca e radhës për konstituimin e Kuvendit të Kosovës pas publikimit të aktgjykimit të plotë të Gjykatës Kushtetuese, por edhe ajo u mbyll pa asnjë rezultat. Që në fillim, duke cituar aktgjykimin e Kushtetueses, kryesuesi i seancës, Avni Dehari, deklaroi se votimi për kryeparlamentarin do të ishte i hapur. Lëvizja Vetëvendosje propozoi dy emra të ndryshëm, por rezultati në të dy rastet ishin njëjtë: 57 vota pro, 56 kundër dhe 3 abstenime. Fillimisht, Glauk Konjufca doli në foltore dhe njoftoi se partia e tij, fituese e zgjedhjeve të shkurtit, propozonte Albulena Haxhiun për kryeparlamentare. Në votimin e hapur, Haxhiu, ministre në detyrë e Drejtësisë, dështoi të merrte drejtimin e organit ligjvënës. Ajo nuk kishte siguruar 61 votat as në seancat paraprake konstituive. Më pas Konjufca, doli me një tjetër propozim, që në fakt, shkaktoi të qeshura të deputetëve që mandatin e kaluar ishin në opozitë.