Pikërisht atëherë kur u duk se pas muajsh të tërë bllokimi, ngërci insitucional në Kosovë u zgjodh me caktimin e Dimal Bashës si kryetar i r ii parlamentit, një pengesë e re u shfaq, duke hedhur hijen e një paralizimi të ri të situatës: në vazhdën e zgjedhjes edhe të tre nënkryetarëve nga radhët e komunitetit shumicë shqiptar, Kuvendit i mbeti edhe detyra për t’i zgjedhur dy nënkryetarë nga komunitetet joshumicë: një nga pakicat joserbe, dhe një nga minoriteti serb. Ndryshe nga vitet e kaluara, kur për këta dy nënkryetarë votohej në paketë, këtë vit votimi është ndarë. Juristët vlerësojnë, sipas REL-së se një gjë e tillë është jokushtetuese, por për ta konfirmuar një gjë të tillë sipas tyre, dikush duhet t’i drejtohet Gjykatës Kushtetuese të vendit. Procesi ngeci kur erdhi puna te zgjedhja e nënkryetarit nga komuniteti serb. Lista Serbe, e cila në Kuvend ka 9 nga 10 vendet e rezervuara për serbët, këmbënguli ta propozonte Sllavko Simicin. Megjithatë, ai nuk arriti të siguronte 61 votat e nevojshme as pas tre raundeve të votimit. Pasi Lista Serbe nuk pranoi të propozonte dikë tjetër për nënkryetar, kryetari i Kuvendit, Dimal Basha, vendosi të hidhte short, sipas Rregullores së punës së Kuvendit, për të nxjerrë një emër tjetër nga komuniteti serb. Përveç disa deputetëve të tjerë të Listës Serbe, për këtë post u propozua edhe Nenad Rashic nga partia serbe Për Liri, Drejtësi dhe Mbijetesë, aktualisht ministër në detyrë në qeverinë e Albin Kurtit. As Rashic nuk i mori votat e nevojshme, ndërkohë që juristët vënë në dyshim edhe kushtetutshmërinë e një zgjedhjeje të mundshme të tij. Ehat Miftaraj, nga Instituti i Kosovës për Drejtësi, deklaroi për Radion Evropa e Lirë kandidatura e Rashiqit është në kundërshtim të plotë me Kushtetutën, praktikën gjyqësore, praktikën parlamentare dhe Rregulloren e Punës së Kuvendit, pasi ai nuk ka shumicën ose gjashtë nënshkrime nga deputetët e komunitetit serb. “Në aspektin juridik, sipas ekspertit, tërë këto votime janë të pavlefshme dhe nuk kanë asnjë vlerë kushtetuese apo juridike”.