Disa kilometra nga kufirit me Serbinë, në fshatin Rodel të komunës së Leposaviqit, Policia e Kosovës gjeti në një shtëpi të pabanuar eksploziv, armë, municion, uniforma ushtarake dhe dokumente. Një person u shoqërua në stacionin policor për intervistim. Ministri i Punëve të Brendshme, Xhelal Sveçla tha këto prova materiale të sekuestruara të premten janë dëshmi se është aktive "Mbrojtja Civile" organizatë e shpallur terroriste nga Qeveria e Kosovës. Sveçla ka bërë përgjegjëse Serbinë për financimin e grupeve si Mbrojtja Civile e që vazhdojnë të jenë kërcënim për sigurinë, derisa nuk e përjashtoi mundësinë e ndërlidhjes së municionit të sekuestruar me sulmet e fundit terroriste. Ministri i Punëve të Brendshme ka bërë të ditur se aktualisht nuk ka indikacione për një sulm të mundshëm, përkundër sekuestrimit të municionit e pajisjeve ushtarake.