Urimeve për fitoren e zgjedhjeve në Rusi nga ana e Vladimir Putinit, iu bashkua edhe presidenti serb Aleksandër Vuçiç, I cili iu ankua edhe për situatën në Kosovë dhe Metohi. Në një postim në rrjetet sociale, Vuçiç ndau një foto me ambasadorin rus në Beograd, Alexander Bocan Harchenko, të cilit tha se I dorëzoi letrën e urimit për Putin, si dhe e falenderoi për mbështetjen e dhënë për Serbinë. “Përveç që ia kam uruar fitoren, ia kam sqaruar edhe peshën e situatës me të cilët po përballen serbët në Kosovë dhe Metohi, sfidat e mëdha politike me të cilat përballet Serbia, dhe e kam falënderuar Rusinë për mbështetjen e saj për integritetin territorial të Serbisë”, shkroi Vuçiç. Urimi erdhi dy ditë pas fitimit të zgjedhjeve nga ana e Vladimir Putin I cili siguroi me lehtësi 87% të votave. Rezultat ky I arritur edhe falë kontrollit të ushtruar nga ana e Kremlinit, pasi liderët opozitar nuk u lejuan t’I bashkoheshin garës, kjo pasi disa prej tyre kanë vdekur ndërsa të tjerë janë në emigrim ose në burg. Edhe pse perëndimi e ka kundërshtuar rezultatin madje ka paralajmëruar masa shtesë ndaj Moskës, Serbia është I vetmi vend europian që nuk ka aplikuar ende sanksione ndaj Rusisë për çështjen e luftës në Ukrainë.