Pas konsumimit të gjitha afateve për ankesa, të enjten, Komisioni Qendror i Zgjedhjeve ka certifikuar rezultatet përfundimtare të zgjedhjeve parlamentare të nëntë shkurtit. Lëvizja Vetëvendosje është partia e parë me 42.30% të votave, përcjell nga PDK me 20.95%, pastaj LDK me 18.27% dhe AAK-NISMA me 7.06%. Megjithatë, certifikimi u bë pa përkrahjen e përfaqësuesve të Lëvizjes Vetëvendosje që kërkoi anulim dhe rivotim me postë, ankesë kjo e cila u rrëzua nga Gjykata Supreme. Derisa të përfundojnë të gjitha mundësitë ligjore edhe në Gjykatën Kushtetuese, unë nuk mund ta votoj certifikimin e këtyre zyrtarëve Grupi më i madh parlamentar në legjislaturën e ardhshme do të jetë Lëvizja Vetëvendosje me 48 mandate, pasuar nga PDK-ja me 24 vende, Lidhja Demokratike e Kosovës 20 vende dhe AAK-NISMA me 8 vende. Serbët në Kuvend do të përfaqësohen nga Lista Serbe që ka siguruar 9 mandate dhe Partia e Nenad Rashiq që ka siguruar një vend. Dhjetë ulëse në parlament janë të rezervuara për komunitetet e tjera pakicë. Certifikimi i rezultateve i hapë rrugë formimit të institucioneve të Republikës së Kosovës. Që nga kjo ditë, Presidentja e Kosovës ka 30 ditë kohë për të thirrur seancën për konstituimin e Kuvendit. Në seancën konstituive së pari themelohet një komision i verifikimit të mandateve dhe kuorumit, pastaj vjen betimi i deputetëve dhe bëhet përzgjedhja e kryetarit që propozohet nga grupi më i madh parlamentar, bëhet votimi i nënkryetarëve të shumicës shqiptare dhe i nënkryetarëve të partive joshumicë Pas konstituimit të Kuvendit, Presidentja fton fituesin e zgjedhjeve që brenda 15 ditësh të prezantojë para kuvendit përbërjen e qeverisë. Për t’u zgjedhur qeveria duhet 61 vota pro, por nëse nuk i ka presidentja ka dy opsione para vetës. E para, ka gatishmëri të ndonjë kandidati tjetër në Kuvend, të ndonjë partie tjetër për të marrë mandatin dhe për të garantuar që ka 61 vota për të zgjedhur qeverinë dhe e dyta, nëse eventualisht del që asnjëra nga partitë nuk kanë shumicë mund të shkojnë në zgjedhje të reja Nga rezultati i këtyre zgjedhjeve, asnjëra prej partive e vetme nuk i ka 61 vota për të formuar Qeverinë e re. Opozita e deritanishme është shprehur e gatshme për një qeveri të përbashkët, ndërkohë që Lëvizja Vetëvendosje thotë se e formon qeverinë e vetme.