Në harkun e 24 orëve të fundit, urgjenca e Spitalit Rajonal të Shkodrës ka pritur rreth 200 pacientë, një shifër që përkon me ngarkesën maksimale të muajit gusht, gjatë kulmit të sezonit turistik. Ajo që ngre shqetësim te bluzat e bardha është fakti se ndër pacientët nuk janë më vetëm të moshuarit, por gjithnjë e më shpesh edhe të rinj. Ndërkohë, prej 1 qershorit ka nisur punën edhe qendra shëndetësore verore në plazhin e Velipojës, ku është shënuar një rritje e ndjeshme e rasteve krahasuar me një vit më parë. Kjo lidhet drejtpërdrejt me numrin më të lartë të pushuesve që po frekuentojnë bregdetin këtë verë. Mjekët apelojnë për kujdes të shtuar, veçanërisht për grupet më të rrezikuara si fëmijët, të moshuarit dhe personat me sëmundje kronike.