Një konflikt për pronën në bregdet regjistroi plagosje me sende të forta dhe të shtëna me armë zjarri këtë të diel në Kepin e Rodonit në Durrës. Zotërimi i çertifikatave të pronësisë nga banorë të zonës dhe nga Kisha Françeskane për të njëjtën sipërfaqe toke në një nga zonat më të bukura të bregdetit shqiptar është kthyer në një përplasje të fortë që ka rritur tensionet në Kep të Rodonit. Këtë muaj konflikti u denoncua dhe në emisionin investigativ Fiks Fare, ndërsa këtë të diel tetë personat e përfshirë në sherrin masiv janë shoqëruar në polici. Ata janë banorë të fshatit Shetaj dhe përfaqësues të kishës katolike. Nga veprimet e para hetimore, sipas policisë së Durrësit, rezultoi se konflikti ka nisur gjatë kohës kur përfaqësuesit e kishës katolike po bënin rrethimin e pronës për të cilën kanë certifikatë pronësie. Banorët e zonës nuk i kanë lejuar që të bëjnë rrethimin pasi edhe ata kanë një certifikatë pronësie për të njëjtën pronë. Konflikti fizik ka vijuar me përdorimin e sendeve të forta, ndërsa ka pasur dhe të shtëna me armë. Në vendngjarje është gjetur dhe një gëzhojë arme zjarri.