Ministria e Punëve të Jashtme të Kosovës ka bërë të ditur se të hënën Serbia ka dërguar shenja të gishtërinjve të personit që e vrau më 19 korrik si të dyshuarin për vrasjen e policit dhe plagosjen e tjetrit më 18 korrik në kufirin mes Serbisë dhe Bosnje-Hercegovinës. Agjencia e Kosovës për Forenzikë nën udhëzimin e Drejtorisë për Bashkëpunim Ndërkombëtar e Policisë së Kosovës ka krahasuar ato shenja me shenjat e gishtrinjve të Faton Hajrizit, të dyshuarit kryesor dhe janë në përputhje. "Pas krahasimit nga AKF, ILECU ka pranuar përgjigje se këto gjurmë i përkasin qytetarit të raportuar si i vrarë, Faton Hajrizi", njofton MPJD. Tutje nga ky institucion kanë kërkuar që të merren me rezerva lajmet nga Serbia, deri në një konfirmim të plotë. Faton Hajrizi, i ikur më 6 korrik nga burgu i Smerkonicës së Vushtrrisë në drejtim të Serbisë, më datë 18 të po atij muaji, pasi u ndalua nga policia kufitare, për arsye ende të paqarta shtiu mbi dy policë, duke lënë të vdekur njërin e plagosur tjetrin. Hajrizi u vra më 19 korrik nga policia serbe që thanë se i dyshuari i rezistoi arrestit.