Partia Demokratike e Shqipërisë ka mbyllur marrëveshjen me aleatët për zgjedhjet parlamentare të 11 majit 2025, përfshi edhe PDIU e Shpëtim Idrizit. Në anën tjetër, marrëveshja me partitë e tjera ka përfunduar me sukses. Partia e Lirisë, e drejtuar nga Ilir Meta, ka arritur të marrë 4 vende të sigurt në listë. Mësohet se dy prej këtyre do të jenë në Tiranë, një në Elbasan dhe një tjetër në Fier. Emra të mundshëm që do të përfshihen në këtë listë përveç Ilir Metës, janë Tedi Blushi, Edmond Haxhinasto dhe Erisa Xhixho. Gjithashtu, partia Republikane e drejtuar nga Fatmir Mediu ka marrë një vend të sigurt, si edhe Partia Agrare Ambientaliste e Agron Dukës dhe PBDNJ e Vangjel Dules. Nga ana tjetër, Partitë Djathtas 1912, të drejtuara nga Rezart Kthupi, dhe LZHK, të drejtuara nga Dashamir Shehi, kanë njoftuar se do të garojnë bashkë në zgjedhjet e 11 majit. Koalicioni i tyre, i njohur si “Djathtas për Zhvillim”, do të ketë shkronjat DZh. Ata kanë dorëzuar kërkesën për regjistrim pranë Komisionit Qendror të Zgjedhjeve. Përveç këtyre, disa parti të tjera kanë dorëzuar kërkesën që të futen në zgjedhje si koalicion. Partia “Lëvizja Shqipëria Bëhet”, Partia “Nisma Thurje” dhe Partia “Lidhja për të Drejtat e Punëtorëve Shqiptarë” kanë rënë dakord për të garuar së bashku.