Ministri i Mbrojtjes i Izraelit, Yoav Gallant, e ka akuzuar Gjykatën Ndërkombëtare Penale (GJNP) se po përpiqet t’ia mohojë Izraelit të drejtën për t’u vetëmbrojtur, pasi kryeprokurori njoftoi se po kërkon fletarrestime për liderët e Izraelit dhe ata të Hamasit. “Tentativa e prokurorit të Gjykatës Ndërkombëtare Penale, për ta zhbërë krijimin e Izraelit nuk do të ketë sukses. Paralelja që prokurori bëri mes grupit terrorist Hamas dhe shtetit të Izraelit, është përbuzëse dhe e neveritshme”, tha ministri. Kryeprokurori i GJNP-së, Karim Khan, deklaroi se beson që Netanyahu, ministri Gallant, dhe tre liderë të Hamasit janë përgjegjës për krime lufte dhe për krime kundër njerëzimit në Rripin e Gazës dhe në Izrael. Në lidhje me liderët izraelitë, kryeprokurori në mënyrë specifike i nënvizoi si arsye për fletarrestime “shkaktimin e urisë tek civilët si mjet lufte”, “shkaktimin e vuajtjeve të mëdha me qëllim”, “udhëheqjen e qëllimshme të sulmeve ndaj popullsisë civile” dhe “veprimet e tjera çnjerëzore”. Ndër të tjera ai i akuzoi tre liderët e Hamasit se janë përgjegjës për “shfarosje”, “rrëmbim”, “përdhunim dhe vepra të tjera të dhunës seksuale “, “torturë” dhe “vepra çnjerëzore”. Prokurori duhet të kërkojë lëshimin e fletarrestimeve nga një panel prej tre gjyqtarësh, të cilëve mund t’iu duhen deri në dy muaj kohë për t’i shqyrtuar provat dhe për të vendosur nëse mund të procedohet. ICC/ AFP/ UNTV/ GPO