Karnivalet e Rio de Janeiro u rikthyen me ngjyra e xhevahirë mbrëmë në Brazil pas dy vjet pezullimi. Celebrimet nisën mbrëmjen e të premtes me kërcimtaret e shkollave më të mira të sambas, në natën e hapjes të festivalit dy-ditor. Pas dy vitesh maskash, distancimesh e vaksinash vallëzimet e orkestrat rimorën kontrollin e stadiumit të paradave 'Sambadrome' në Rio de Janeiro . Arena është kthyer në simbolin e festimeve të karnivalit prej viteve 1980-të teksa gjatë kohës së izolimit ishte kthyer në qendrës strehimi për të pastrehët. “Jam shumë e lumtur, shumë njerëz do të qajnë ...përfshi edhe unë”, tha Ana Vieira,mësuese gjeografie 48-vjeçare që merr pjesë prej 20 vjetësh në karnival. “Karnivalet janë jeta jonë. Mund të shikosh lumturinë në fytyrat e njerëzve pas dy vjet izolimi”, shtoi ajo për rrjetin AFP. Ketula Melo, kërcimtare 38 vjeçare e shkollës Imperatriz Leopoldinense ishte veshur si shenjtorja afro-braziliane Iemanja. “Këto dy vite kanë qenë të tmerrshëm. Tani mund të gëzohemi përsëri”, tha ajo.