Astrit Isufi i dyshuari për vrasjen e dyfishtë në Malishevë, ka qenë i dënuar në dy raste të ndryshme. Më 16 prill të këtij viti, Isufi ishte dënuar për “dhunë në familje” dhe “kanosje” ndaj gruas së tij. Sipas aktgjykimit të Gjykatës Themelore të Prishtinës, Isufi kishte rrahur gruan e tij më 30 mars të këtij viti. Fillimisht në orët e hershme e kishte goditur me peshqir dhe i kishte kërkuar gruas së tij t’i zgjojë fëmijët nga gjumi, meqë ishte dita e Festës së Bajramit. Duke qenë se fëmijët nuk ishin zgjuar, Astrit Isufi e kishte goditur me grushte gruan e tij. Isufi e kishte vazhduar dhunën fizike ndaj bashkëshortes edhe pasi ishte kthyer në shtëpi e kishte kërkuar ushqim nga ajo. Dhunën nuk e ka ndalur aty, Astrit Isufi e kishte tërhequr zvarrë bashkëshorten duke e dërguar në një dhomë tjetër për të vazhduar me goditjet me kabllo. Sipas aktakuzës së prokurorisë, deri në momentin kur të njëjtit i ishte dukur e mjaftueshme, ku më pas e ka kërcënuar duke i thënë “ti nuk guxon me u nda me mua, se ka me ta vra familjen, ka me t`i faru krejt”. Për këtë, Astrit Isufi më 16 prill ishte dënuar nga Gjykata Themelore e Prishtinë me burg në kohëzgjatje prej 154 ditësh dhe 300 euro gjobë për “dhunë në familje” dhe për “kanosje” ishte gjobitur me 500 euro. Megjithatë, më 26 qershor, Gjykata e Apelit i kishte ulur dënimin Isufit, pas ankesës së mbrojtjes në vetëm 3 muaj burgim dhe gjobë prej 300 euro për dhunë në familje dhe nuk kishte ndryshuar dënimin me gjobë për veprën penale të kanosjes. Isufi ishte dënuar në shtator edhe për “kanosjen” e familjarëve të gruas nga Gjykata Themelore e Prishtinës – Dega në Drenas. Sipas aktakuzës së ngritur nga prokurori i Prokurorisë Themelore në Prishtinë, më pesë prill, Astrit Isufi dhe vëllai i tij Petrit Isufi i kishin kanosur seriozisht me dashje dy anëtarë të familjes së miqve pas një konflikti verbal. “I akuzuari – dhëndri i tyre, Astrit Isufi iu ishte drejtuar me fjalë të dëmtuarve ‘dilum nga lokali se ju vras dhe kini afat deri të shkoni në shtëpi, sepse si te shkoni ne shtëpi unë do t’iu vrasë’, kurse i akuzuari Petrit Isufi iu ishte drejtuar me fjalët ‘dilni jashtë se ju vras’”, thuhet në vendimin e gjykatës. Astrit Isufi dhe vëllai i tij, Petriti kishin pranuar fajësinë e për veprën penale të “kanosjes” ishin dënuar me 200 euro gjobë. Dy muaj më vonë, saktësisht më 6 nëntor, Astrit Isufi dyshohet se qëlloi për vdekje vëllezërit e gruas së tij, Driton e Naim Morinën në Golluboc të Malishevës. Isufi u arrestua një ditë pas ai u arrestua në fshatin Plloqicë, i plagosur e aktualisht po merr ndihmë mjekësore në Qendrën Klinike Universitare të Kosovës.