Rreth 400 pasagjerë, të cilët udhëtonin nga Bergamo dhe Bologna drejt Aeroportit të Rinasit, mbetën të bllokuar për shkak të motit të keq në aeroportin e Brindisit. Nga informacionet e fundit që korrespondenti i Top Channel Mikel Marsi ka mundur të sigurojë, 220 prej tyre tashmë po hyjnë në traget për t’u nisur drejt Shqipërisë, ndërsa pjesa tjetër janë kthyer pas nga qytetet të cilat ishin nisur. Pasagjerët, të cilët kishin si destinacion përfundimtar Shqipërinë, kanë qëndruar për orë të tëra në aeroportin e Brindisit. Për shkak të mungesës së informacionit dhe zgjidhjeve nga kompania ajrore, ata kanë protestuar duke penguar edhe zhvillimin normal të proceseve dhe shërbimeve në aeroportin e Brindisit. Sipas pasagjerëve, kompania ajrore Ëizz Air i ka braktisur, duke i lënë në aeroport pa akomodim, transport alternativ apo sqarime të qarta për vazhdimin e udhëtimit.