Pak kilometra larg Ramës dhe për herë të parë me kapele në kokë, me numrin 1, dhe kollare të verdhë, si Donald Trump, Sali Berisha kërkoi votën nga Kamza, me premtimin se do rikthejë shqiptarët në atdhe. “Ne do bëjmë gjithçka që ata të vijnë të ndërtojnë ëndrrën e tyre të bukur, ëndrrën shqiptare në dheun e tyre. Dhe më lejoni pak t’i them atij burracakut 2 metra që fshihet dhe nuk del dot, pasi e keni kapur me presh në dorë duke vjedhur, nuk del dot të ballafaqohet para jush në televizion apo në skenë. Jo”. Berisha premtoi më shumë investime për banorët e Kamzës, ndërsa shënjestroi kryebashkiakun socialist, Rakip Suli. “Qytetarë, u bëj thirrje, krijoni një komision, merrni listën e borderosë tek Rakip Veliaj, do të gjeni të paktën një të tretën e emrave në bordero që nuk ekzistojnë në Shqipëri. 5D është modeli i tyre. 11 Maji është një ditë për çdo qytetar të këtij vendi që do të shpërblehet më mirë për punën që ka bërë apo që bën. Një zotim, Berisha e bëri edhe për Bashkinë e Kamzës, nëse fiton zgjedhjet. “Garantoj biznesmenët e Kamzës, biznesin e vogël se brenda 100 ditëve të para, bashkia do e ketë kufirin tek thana dhe nuk do mund të vendosë kurrë taksa më shumë se 1 përqind të xhiros”.