Hatixhe dhe Jashar Stojku janë kthyer ditët e fundit në çiftin më të komentuar, kjo pasi policia i hoqi patentën 19-vjeçares dhe i sekuestroi makinën luksoze Porsche, pas videove të publikuara në rrjetet e saj sociale ku tregonte se ecte me shpejtësi tej normave të lejuara. Pas kësaj, ajo ka bërë një sërë reagimesh me ironi për policinë, duke thënë se “kanë arrestuar kriminelen më të fortë sot për sot”. Më tej ajo ka treguar se edhe pse i kanë hequr patentën, tashmë është burri i saj i cili e shoqëron kudo ku ajo ka nevojë me makinë. Në rrjetet sociale prej kohësh ajo ka zgjedhur që të reklamojë jetën e saj të luksit krah bashkëshortit, duke treguar se ai i paguan çdo gjë. Në disa prej këtyre videove të bëra virale, ajo shfaqet në makina të shtrenjta e po ashtu edhe duke lëvizur me helikopter, që siç thotë ajo, është një mënyrë që ata zgjedhin për të shmangur trafikun në Tiranë. Hatixhe, e njohur si Hati, është një vajzë e re, e mbuluar me shami, por që reklamon jetë luksi, duke treguar veshje të shtrenjta, trajtime fytyrë, pushime luksoze apo dhurata që merr me vlera marramendëse. Komentet në rrjetet e saj sociale janë të shumta, e mes tyre ka nga ato që e komentojnë negativisht duke i thënë se nuk përfaqëson fenë myslimane dhe se shaminë e mban vetëm për të rritur shikueshmërinë dhe klikimet. Jo të pakta janë rastet kur ajo u kthen përgjigje komentuesve me ironi. Pyetjes së kush e mban me lekë, ajo i përgjigjet se e mban burri i saj Jashari. Në një video të publikuar kohë më parë ajo tregon momentin kur bashkëshorti futet në një dyqan të një firme të shtrenjtë për t’i blerë një çantë. “Jashari ka nevojë për dikë që të më mbajë çantat”, shkruan ajo. Në një video tjetër, ajo shfaqet duke kërcyer dhe duke kënduar një këngë që flet për kokainën. “Me shami dhe këngë kokaina... po i paraprij komenteve tuaja”, shkruan Hati. “Hapja e dhuratave 7 mijë euro... Teorikisht Jashari ka blerë gjithë dyqanin”, shkruan ajo në një tjetër video. “A ta bëjmë një fëmijë miliarder”, vijon me një tjetër postim. Teksa shfaqet në një video tjetër duke kërcyer në një dasmë, një komentues i shkruan se nuk ‘është gjë për të kërcyer”, ndërsa ajo ia kthen me ironi: Jam për gjëra më të mëdha se kaq. “Vera po mbaron”, shkruan në një tjetër video ku shfaqet duke shijuar pushimet në brigjet shqiptare, teksa më tej shkruan: Vera për ju, për mua do e shihni sa zgjat. Në një nga videot e shumta që shfaqet duke i dhënë makinave të shtrenjta, Hati shkruan: Me mjete të rënda! Ndërkohë në një video tjetër ku shfaqet duke kërcyer dhe dëgjuar një këngë që flet për lekët, ajo lë këtë koment: Kënga që më motivon të harxhoj lekët e Jasharit. S’mendoj fare që do ha bukë dhe nesër. Këto dhe shumë video të tjera që ajo poston në rrjet, janë kthyer në virale në platformën Tik Tok, dhe duket se Hati ka zgjedhur që të pranojë dhe komentet negativë, duke treguar se nuk i ndikojnë aspak. Edhe pas sekuestrimit të makinës nga policia, ajo reagoi duke thënë se do të blejnë një tjetër, e po ashtu me ironi shkruante: Jashar bëj gati helikopterin.