Forcat izraelitë mësynë anijet e flotiljes ndërkombëtare Sumud, e tani ministria e jashtme e shtetit hebre thotë se akvistët pro-palestinezë do t`i dëbojë drejt Europës. “Pasagjerët e Sumudit të Hamasit grupit palestinez të shpallur organizatë terroriste nga Shtetet e Bashkuara dhe Bashkimi Evropian janë nisur drejt Izraelit, ku do t’iu nënshtrohen procedurave të dëbimit në Europë. Ata janë të sigurt dhe në gjendje të mirë shëndetësore”, tha ministria në platformën X. IDF-ja ndaloi më herët 14 anije me aktivistë të huaj dhe ndihma për banorët e Gazës që po vuajnë nga uria. Megjithatë, 23 anije të tjera po vazhdojnë lundrimin drejt enklavës palestineze, pohuan organizatorët e flotiljes. Në një video të publikuar më herët nga Ministria e Jashtme e Izraelit shihen shumica e aktivistëve më të njohur që po lundrojnë me këto anije, përfshirë edhe aktivisten suedeze për klimën, Greta Thunberg, të ulur në anije dhe të rrethuar nga ushtarët. Flota Global Sumud, që po transporton ilaçe dhe ushqime për në Gazë, përbëhet nga më shumë se 40 anije civile dhe afër 500 ligjvënës, avokatë dhe aktivistë. Disa video janë postuar në Telegram me mesazhe nga persona në disa anije, disa duke mbajtur pasaportat e tyre e duke pretenduar se janë rrëmbyer e janë dërguar në Izrael kundër vullnetit të tyre dhe duke përsëritur se misioni i tyre është humanitar dhe nuk është i dhunshëm, dhe se qëllimi i vetëm është të kundërshtojë bllokadën që Izraeli ka vendosur ndaj Gazës.