Protestat masive që vijojnë prej dy javësh në Iran po përhapen edhe në vende të tjera të botës. Qindra qytetarë janë ngritur në protestë në Britaninë e Madhe, në shenjë solidariteti me qytetarët iranianë, të cilët po përballen me regjimin në Republikën Islamike. Protestuesit marshuan në rrugët e Londrës kundër qeverisë në Iran. Ata qëndruan jashtë ambasadës iraniane në kryeqytetin britanik, ku pati dhe qytetarë që u ngjitën në ballkonin e godinës, ndërsa mbanin në dua flamuj dhe brohorisnin kundër qeverisë së Ajatollah Khamenei. Sipas autoriteteve angleze, janë arrestuar të paktën dy persona. Protesta pati të shtunën edhe në kryeqytetin e Gjermanisë. Qindra demonstrues u mblodhën në Berlin për të treguar solidaritetin me qytetarët e Iranit, që po përballen me dhunën e regjimit. Protestat antiqeveritare shpërthyen në Teheran më 28 dhjetor, dhe u përshkallëzuan në të gjithë vendin.