Mes tensioneve, në Shkodër është përkujtuar 78-vjetori i Kryengritjes së Postribës, lëvizjes së parë antikomuniste në Shqipëri. Kryebashkiaku i majtë Benet Beci ka nderuar këtë datë përkujtimore, teksa ka vendosur kurora me lule pranë memorialit që ndodhet në njësinë administrative të Postribës. Por, ashtu si edhe një vit më parë, ky përkujtim nuk ka kaluar pa incidente, pasi pasardhës të të pushkatuarve i kërkuan socialistit të largohet. Më pas, banorët, të shoqëruar edhe nga përfaqësues të Partisë Demokratike, hoqën nga memoriali edhe lulet e të majtëve. Ata akuzuan se policia ka arrestuar disa prej tyre. Më 9 shtator të vitit 1946, mbi 150 burra të Postribës, Shkodrës e Gurit të Zi kundërshtuan instalimin e regjimit komunist. Mbahet mend si revolta e parë antikomuniste, me përmasa të mëdha në Shqipëri.