Kryeministri i Spanjës, Pedro Sanchez po dominon faqet e para të gazetave spanjolle pas deklaratës së një dite më parë se po konsideronte dorëheqjen pasi një gjykatë hapi një hetim ndaj gruas së tij Begona Gomez me dyshimin për korrupsion, të nxitur nga akuzat e kundërshtarëve të tij të djathtë. Ndërsa Sanchez ka anuluar axhendën e tij publike deri të hënën në pritje të marrjes së një vendimi përfundimtar për fatin e tij politik, shumë qytetarë shprehen se ai duhet të ikë. “Mendoj se nuk duhet të presë disa ditë, ta japë dorëheqjen tani. Kjo është gjëja më e mirë që mund të bëjë për të gjithë, besoj se ky do të ishte një akt i guximshëm nga ai për t'i dhënë spanjollëve mundësinë për t'u shprehur përsëri me votë”, tha një qytetare për AFP-në. Ndërkohë që një tjetër u shpreh, “Unë mendoj se njerëzit janë të lodhur dhe të zhgënjyer me politikën në përgjithësi. Mendoj se rraskapitja dhe humbja e shpresës është diçka e përgjithshme." Qytetarë të tjerë thonë se kryeministri Sanchez luan gjithmonë me të tilla gjëra, luan me emocionet e njerëzve dhe kjo është strategjia e tij, prandaj nuk habiten, nëse të hënën ai do ta tërheqë dorëheqjen.