Një aktiviste tailandeze që kishte nisur grevë urie në protestë për shkak të burgosjes së saj për “ofendim ndaj monarkisë”, ka humbur jetën papritur pas dy muajve që nga nisja e masës ekstreme. Netiporn “Bung” Sanesangkhom vdiq pasi zemra e saj “ndaloi papritur” mëngjesin e sotëm, njoftuan autoritetet. 28-vjeçarja e ndjerë ishte pjesë e një lëvizjeje të rinjsh që kërkojnë reforma të mbretërisë, ndërsa ishte burgosur më 26 janar për disa akuza, mes të cilave ‘ofendim të monarkisë’. Ajo kishte nisur grevën e urisë duke pranuar vetëm ujë, ndërsa prej muajit të kaluar nis të pranonte dhe ushqim, sipas raportimeve. 28-vjeçarja kërkonte reforma në sistemin gjyqësor të Tailandës, duke përfshirë dhe ligjin për mbretërorët, që cilëson si kriminale komentet kundër mbretërisë. Nuk është e qartë se për sa kohë ajo kishte refuzuar ushqimin herën e fundit, teksa zyrtarët thanë se kishte nisur të pranonte ushqim sërish në prill. Ata shtonin se grevat e urisë kishin bërë që ajo të vuante nga anemia, ndërsa zyrtarët thonin se e ndjera kishte refuzuar vitamina apo suplemente minerale. Pamjet: AFP