Gjykata e Lartë e Venezuelës ka mbështetur pretendimet e presidentit, Nikolas Maduro se ai i fitoi zgjedhjet presidenciale të muajit të kaluar, dhe tha se votat e publikuara në internet që tregojnë se ai humbi, ishin falsifikuar. Vendimi shkon në favor të përpjekjes së fundit të Maduros për të zbutur protestat dhe kritikat ndërkombëtare që shpërthyen pas votimit të kontestuar të 28 korrikut, në të cilin lideri i vetëshpallur socialist po kërkonte një mandat të tretë gjashtëvjeçar. Gjykata e Lartë është e mbushur me njerëz besnikë të Maduros dhe pothuajse kurrë nuk ka vendosur kundër qeverisë. Maduro pretendonte se ishte dëmtuar nga një sulm kibernetik i huaj, i organizuar nga hakerë nga Maqedonia e Veriut, ndërsa Koalicioni kryesor i opozitës e akuzon atë se po përpiqet të vjedhë votat. Falë një nisme inteligjente në terren në ditën e zgjedhjeve, vullnetarët e opozitës arritën të mbledhin kopje të numërimit të votave në 30,000 qendrat e votimit në mbarë vendin që tregojnë se kandidati i opozitës Edmundo Gonzalez fitoi me një diferencë të thellë. Fletët zyrtare të numërimit të printuara nga çdo makinë votimi përmbajnë një kod që e bën të lehtë për këdo që të verifikojë rezultatet dhe është pothuajse e pamundur të përsëritet. Vendimi i Gjykatës së Lartë bie ndesh me gjetjet e ekspertëve nga Kombet e Bashkuara, të cilët u ftuan për të vëzhguar zgjedhjet dhe përcaktuan se rezultatet e shpallura nga autoritetet nuk ishin të besueshme.