Papunësia tek të rinjtë është e lartë, megjithëse bizneset vazhdimisht kërkojnë punëtorë. Referuar INSTAT-it, për tremujorin e dytë të këtij viti, papunësia për grupmoshën 15-29 vjeç ishte 22,3%. Po çfarë e shkakton këtë shkallë të lartë papunësie tek të rinjtë që i përkasin Gjeneratës Z? “Është e vërtetë që kërkohen punëtorë, por shpeshherë punëdhënësit në Shqipëri janë me kulturën e vjetër, që punonjësi do të vijë, do të punojë 8 orë, do paguhet dhe kaq ishte. Ndërkohë që të rinjtë e Gjeneratës Z të lindur nga 1995 deri në 2010 kanë kanë pritshmëri të tjera nga punëdhënësi. Ata synojnë jo vetëm një pagë të mirë, të cilën shpeshherë e kanë si faktor dytësor, por kërkojnë që ambienti të jetë motivues, të respektohet balanca mes jetës private dhe punës, pra kërkojnë një mirëqenie mendore”, tha Lutjona Lula, Eksperte për çështjet e rinisë.