Fondi Monetar Ndërkombëtar po zhvillon takimet pranverore, ku marrin pjesë përfaqësues të 190 shteteve anëtare, mes të cilave është edhe Kosova. Të premten disa zyrtarë të FMN-së deklaruan se Kosova ka varësi të madhe nga importi. Duke qenë se është kryesisht ekonomi konsumuese, Kosova varet nga ekonomia e vendeve prej të cilave importon. Nëse flasim për shifrat, rritja ekonomike më 2023 sipas FMN është 3.3 %, ndërsa parashikimet janë që vitin e ardhshëm rritja të jetë 3.8 për qind. Në prezantimin e këtij raporti, drejtori i departamentit të FMN për Europën tha se Kosova duhet që theksin kryesor ta vendosë te rritja e prodhimtarisë. Sa i përket energjisë, zyrtarë të FMN-së kanë bërë të qartë që përkrahjen e madhe që po e merr Kosova për rritjen e gjelbër duhet që ta realizojë sa më shpejt që të shmangë vendosjen e taksës së karbonit. Kosova e ka kusht që më 2025 nëse nuk i arrin kuotat e duhura, atëherë do ta paguajë këtë taksë.