Policia e Kosovës e ka shpallur në kërkim këngëtarin shqiptar Rigels Rajku të njohur si Noizyn. Ai kërkohet si i dyshuar për veprën penale të lëndimit të rëndë trupor. Për të njëjtën vepër, Drejtoria Rajonale e qytetit të Pejës, kërkon ndihmën e qytetarëve në lokalizimin edhe të Bahtjar Bajraktarit, bashkëpunëtor i Noizyt. "Tё pandehurit kërkohen për veprën penale: ‘Lёndim i rёndё trupor’. Policia e Kosovës kërkon nga qytetarët e Republikës së Kosovës që kushdo që ka informacion për vendndodhjen e personave të dyshuar në fotot e bashkangjitura, të lajmërojë Policinë e Kosovës apo të lajmërohet në stacionin më të afërt policor", thuhet në njoftimin e Policisë së Kosovës. Nga Prokuroria e Pejës thonë që në momentin që të njëjtit hyjnë brenda territorit të Kosovës do të arrestohen. Këtë të hënë, këngëtari shqiptar Noizy do të performonte në Gjilan, por përmes rrjeteve sociale ka njoftuar se e ka anuluar performancën. Rajku dhe Bajraktari dyshohet se ditë më parë janë përfshirë në një përleshje fizike me dy persona në një klub nate në qytetin e Pejës. Sipas informacioneve dy personat kishin përfunduar duke marrë trajtim në Spitalin Rajonal të Pejës.