Starton sonte në ekranin më të dashur të shqiptarëve, sezoni i 22-të televiziv i emisionit Fiks Fare, që u jep zë dhe zgjidhje problemeve që shqetësojnë qytetarët. Moderimi këtë sezon i është besuar dy figurave shumë të dashura të publikut shqiptar, Julian Deda dhe Xhemi Shehu. Çdo mbrëmje, duke filluar nga ora 20.10 në Top Channel, Xhemi dhe Juli do t’ua bëjnë më të bukur tryezën shqiptarëve, duke u servirur investigime, kronika denoncuese, apo edhe intervista humoristike nga çdo cep i Shqipërisë. Në krah të dy moderatorëve do të jenë dy bukuroshe të reja. Balerinat profesioniste Dori dhe Luisa janë dy velinat e reja të “Fiks fare”, njëra shqiptare e tjetra spanjolle, e ashtu siç është bërë traditë njëra bjonde dhe tjetra brune. Në fokusin e puntatës së parë, që përkon me nisjen e vitit të ri shkollor, do të jenë problemet në arsimin shqiptar. Investigimi I Fiks Fare ka zbuluar veprimet abuzive të një mesuesi në një fshat të elbasanit, I cili u shkruan nxënëseve të klasave të nënta në rrjetin social facebook dhe u kërkon numrat e telefonit për të vazhduar komunikimin më tej me to. Te gjitha faktet e mbledhura por dhe dëshminë e vetë këtij mëusesi do ta ndiqni sonte në Fiks Fare. Programi më i ndjekur televiziv, i cili bazohet te denoncimet dhe korrupsioni i të gjitha hallkave të administratës, ka punuar gjatë këtyre javëve, duke zbuluar nga çdo skaj i Shqipërisë problematikat e shumta. Korrupsion, krime mjedisore, abuzime me detyrën, përfitime të padrejta, shkelje e barazisë në tendera, falsifikime dokumentesh, e shumë tematika të tjera, janë investiguar nga Fiksi dhe do të transmetohen gjatë këtij sezoni televiziv. Gjithçka të faktuara, me zë dhe figurë, Fiksi vjen me risi, por duke ndjekur me fanatizëm analizimin e fakteve. Tashmë, sytë dhe veshët e shqiptarëve do të rikthehen në Top Channel, nga e hëna në të premte, pas edicionit qendror të lajmeve.