Një rast pozitiv me virusin e Nilit Perëndimor është shënuar edhe në Kosovë të mërkurën, njoftoi Instituti Kombëtar i Shëndetësisë Publike i Kosovës. Një burrë 59-vjeçar nga komuna e Fushë Kosovës po mjekohet në Klinikën Infektive të QKUK-së prej 29 korrikut, për shkak të simptomave si, lodhja dhe temperatura e lartë. “Pacienti nga data 27 deri më 29 qershor ka qëndruar në Shëngjin në Shqipëri, ndërsa nga data 13 deri më 22 më 22 korrik ka qëndruar për pushime në Ulqin. Simptomat i janë paraqitur menjëherë pas kthimit nga Ulqini”, thuhet në njoftim. IKSHPK shtoi se situata epidemiologjike “është e qetë dhe po përcillet me kujdes të shtuar”. Virusi transmetohet kryesisht nga mushkonjat dhe ndër simptomat e infektimit janë dhimbja e kokës, temperatura, dhimbjet e muskujve dhe lodhja e konsiderueshme. Ekspertët sugjerojnë që disa prej mënyrave për t’u mbrojtur nga infektimi janë: veshja e rrobave me mëngë të gjata dhe ngjyra të hapura, që të mos dilet në ambiente të hapura gjatë periudhës kur mushkonjat janë më së shumti aktive – në muzg dhe në agim - si dhe të përdoren rrjeta nëpër ambiente të hapura të shtëpive.