Pasi festuan në vend Krishtlindjen dhe natën e ndërrimit të viteve, emigrantët kanë nisur të largohen drejt Greqisë. Në përfundim të ditëve të pushimit kur edhe emigrantët duhet ti rikthehen punës dhe shkollës në vendin ku jetojnë largimi i tyre sjell disafishim të shifrave mesatare ditore të lëvizjes. Në 24 orët e fundit rreth 7000 persona dolën nga Shqipëria përmes pikës së kalimit kufitar të Kapshticës por pavarësisht lëvizjes së shtuar nuk u shënuan probleme për udhëtarët. Duke patur parasysh se para festave mbi 60 mijë emigrantë hynë në vend autoritetet kanë rritur gatishmërinë për të përballuar fluksin që mund të krijohet gjatë largimit të tyre. Në të dyja anët e kufirit është punuar me nga 5 sportele ndërsa në oraret e autobusëve janë shtuar sportele për të shmangur vonesat e udhëtarëve. Ndërsa largimi i emigrantëve sapo ka nisur autoritetet apelojnë që ata të mos presin momentin e fundit për të udhëtuar në mënyrë që të mos krijohen radhë.