Agjencia e Barnave të Bashkimit Evropian tha se një variant "plotësisht i ri" i COVID-19 mund të shfaqet këtë dimër. Megjithatë EMA shtoi se vaksinat ekzistuese mbrojnë ende njerëzit nga të sëmurit rëndë. Zyrtarët e Agjencisë Evropiane të Barnave (EMA) më 2 shtator thanë se organizata po përgatitet të hapë një fushatë për vaksinat përforcuese përpara një vale të re të parashikuar të rasteve të koronavirusit. Shefi i vaksinave në EMA, Marco Cavaleri tha në një konferencë shtypi se njerëzit "nuk duhet të presin për një vaksinë specifike". Më 31 gusht EMA miratoi vaksinat nga Pfizer/BioNTech dhe Moderna që janë krijuar për të luftuar nënvariantin BA.1 të omicron. Një vaksinë e zhvilluar nga Pfizer që synon variantet tashmë mbizotëruese BA.4 dhe 5 pritet të miratohet në javët e ardhshme. Vaksinat e reja të përshtatura me Omicron do të rezervohen kryesisht si përforcues për të moshuarit, katëgoritë e ndjeshme, gratë shtatzëna dhe punonjësit e kujdesit shëndetësor, tha Cavaleri. Shumica e njerëzve do të vazhdojnë të marrin vaksinat origjinale të krijuara për të trajtuar llojin origjinal të koronavirusit.