Elbasani është përballur këtë të martë me katër vatra zjarri në vetëm pak orë. Situata më e vështirë u paraqit në landfillin pranë inceneratorit ku zjarri nisi rreth orës 17 dhe vatra vijon të jetë aktive. Re të mëdha tymi toksik përfshinë herë qytetin dhe herë zonën e fshatrave, sipas erës së fortë që vazhdimisht ndryshtonte drejtimin e saj. 15 mjete zjarrfikëse më shumë se 100 efektivë nga bashkitë e qarkut, e emrgjencat civile, Kamza, Tirana e Berati u angazhuan në ndihmë të ekipeve të Elbasanit. Ende heret për të folur për shkaqet thotë Arben Cara, drejtori i Përgjithshëm i Zjarrfikëseve, ndërsa shpjegon që zjarret në landfille janë shumë të vështira për tu vënë nën kontroll. Ndërkohë që situata e zjarreve në të gjithë vendin vijon të jetë e vështirë, Cara kërkon zbatim të ligjit dhe vënien para drejtësisë të zjarrvënësve. Ndërkohë më herët u përfshi nga flakët kodra me ullishte pranë fshatit Balëz në veriperëndim të Elbasanit. Terreni i malor, temperaturat e larta dhe era e fortë vështirësuan ndërhyrjen me mjete ndërsa forcat e ushtrisë ndërhynë me helikopter nga ajri. Qindra rrënjë ullinj shekullorë u dogjën. Vatrat e tjera të shfaqura këtë të martë në Elbasan në fshatin Mëngël dhe Samurr u vunën nën kontroll në pak minuta.