Vasile Frumuzache, autori i dyshuar i vrasjes së Denisa Maria Adas dhe rrëfyesi i një tjetër krimi makabër ndaj një tjetër punonjëse seksi, është sulmuar brenda ambienteve të burgut. Sipas autoriteteve italiane, agresioni është kryer nga një tjetër i burgosur, i afërm i viktimës së dytë, Ana Maria Andrei, e zhdukur dhe e vrarë në vitin 2024, shkruajnë mediat italiane. Sipas burimeve nga burgu, agresori i ka hedhur vaj të nxehtë në fytyrë, duke i shkaktuar djegie të shkallës së parë dhe të dytë. Viktima e sulmit është dërguar me urgjencë në spitalin e burgut për trajtim mjekësor. Prokurori i burgut, e ka cilësuar ngjarjen serioze, duke theksuar se autori i agresionit ka vepruar “i pashqetësuar dhe pa asnjë kontroll nga autoritetet e burgut”. “Çdo person, pavarësisht nga krimet që mund të ketë kryer, ka të drejtën për t’u trajtuar me njerëzillëk dhe për t’u mbrojtur. Askush nuk duhet të përballet me dhunë jashtë ligjit,” u shpreh prokurori. Ndërkohë që Frumuzache përballet me drejtësinë për dy vrasje të dyshuara, hetuesit italianë kanë gjetur të dhëna të reja në banesën e tij, që mund të çojnë në zbardhjen e rasteve të tjera të pazbuluara deri tani. Gjurmët e mbledhura gjatë kontrollit të banesës kanë ngritur dyshime të forta se mund të ketë më shumë se dy viktima. Autoritetet nuk përjashtojnë mundësinë e zbardhjes së një serie të gjerë vrasjesh. Të shtunën në mëngjes pritet të mbahet seanca dëgjimore për konfirmimin e urdhër-arrestit ndaj 32-vjeçarit, i akuzuar për vrasje të rëndë dhe fshehje të kufomës.