Dy vite e gjysmë luftë kanë shkaktuar eksod dhe rënie të lindjeve në Ukrainë, duke bërë që popullsia e vendit të jetë sot 8 milionë më pak. Sipas shifrave të publikuara nga Kombet e Bashkuara, ka një rënie dramatike të popullsisë në Ukrainën e shkatërruar nga lufta. Florence Bauer - drejtoresha e UNFPA për Evropën Lindore dhe Azinë Qendrore - Popullsia ka rënë me rreth 10 milionë që nga viti 2014 dhe me rreth tetë milionë që nga fillimi i pushtimit të plotë në vitin 2022. OKB, që citon të dhënat nga zyra kombëtare e statistikave, thotë se Ukraina numëronte 45 milionë banorë në vitin 2014, kur Rusia pushtoi dhe aneksoi Krimenë dhe deri në shkurt të vitit 2022, kur Rusia nisi pushtimin e saj në shkallë të plotë të Ukrainës, popullsia ishte zvogëluar në 43 milionë, për të vazhduar më tej rënien drastike dhe sot vetëm 35 milionë qytetarë jetojnë në Ukrainë. Një tjetër faktor për emigrimin, sidomos të të rinjve, është dëshira për të lëvizur drejt vendeve me nivel më të lartë jetese dhe me më shumë mundësi. Ukraina, prej vitesh ka pasur në një nga nivelet më të ulëta të lindjeve të Europë, sot ka arritur në nivelin e një fëmije për çdo grua, kur sipas OKB-së, për të ruajtur numrin e popullsisë, norma teorike e zëvendësimit është 2.1 fëmijë për grua. Këto shifra publikohen teksa Rusia vijon sulmet ndaj infrastrukturës në Ukrainë, veçanërisht asaj energjetike, duke shkatërruar pjesën më të madhe të kapacitetit prodhues të energjisë. Për pasojë, ky pritet të jetë dimri më i vështirë i luftës deri më tani.