Për herë të parë gjykata më e lartë e emigracionit në Angli SIAC (Komisioni Special i Apeleve të Emigracionit) që prej krijimit të saj në vitin 1997, është duke shqyrtuar kërkesën e një politikani. Ai është Sali Berisha, i shpallur Non Grata pas SHBA edhe nga Anglia në vitin 2022 për korrupsion dhe lidhje me krimin. Gazetari i Top Channel Muhamed Veliu, raporton se zoti Berisha në sekret të plotë ka pajtuar një kompani avokatore për këtë proces, nisur paraditen e kësaj të marte. Gjatë katër ditëve në vijim thekson gazetari Muhamed Veliu, në raportin e tij për edicionin qendror të lajmeve në Top Channel, kompania avokatore londineze Zaiwalla and Co së bashku me përfaqësuesin ligjor Fergus Randolph KC, do t’i paraqesin kësaj gjykate, argumentet se vendimi për ndalimin e hyrjes të zotit Berisha në Angli është i padrejtë.