Kandidati i republikanëve për president të SHBA, Donald Trump, ka thënë se do ta shkarkojë “brenda dy sekondave” prokurorin special, Jack Smith, në momentin kur merr postin e presidentit. Ai ka deklaruar të enjten se ky do të jetë ndër vendimet e para si president i Shteteve të Bashkuara të Amerikës, ndërsa e ka cilësuar prokurorin special si person “të poshtër”. Smith e ka akuzuar Trumpin për përpjekjet e tij në përmbysjen e procesit zgjedhor të 2020-s dhe keqpërdorim me dokumente të falsifikuara. Por, prokurori Jack Smith, që tani vepron vetëm në SHBA, dikur ka mbajtur postin e kryeprokurorit të Zyrës së Prokurorit të Specializuar në Hagë, ku po gjykohet ish-presidenti i Kosovës Hashim Thaçi, Kadri Veseli, Jakup Krasniqi dhe Rexhep Selimi. Nëntorin e vitit 2022 Smith braktisi detyrën në Hagë, për t'u kthyer në Shtetet e Bashkuara me qëllim që ta hetojë Trumpin. Ai është fokusuar në hetimin e dokumenteve të klasifikuara të gjetura në shtëpinë e Trumpit dhe për rolin e ish-presidentit në sulmin ndaj Capitolit. Kritika ndaj Smithit ka pasur edhe ish-emisari amerikan për dialogun Kosovë-Serbi, Richard Grenell. Ai ishte shprehur se aktakuza ndaj ish-presidentit Hashim Thaçi nga Dhomat e Specializuara u parapri nga negociatat për arritjen e “marrëveshjes finale që përfshinte edhe zhbërjen e Gjykatës Speciale”. “Një grup prokurorësh nuk mundën të gjenin prova kundër Thaçit. Haga vazhdoi të shpenzonte dollarët amerikanë dhe Jack Smith shpenzoi vite duke hetuar krime lufte”, ka thënë Grenell për Smithin në majin e 2024-s. Por, Smith pati deklaruar se akuzat nuk janë kundër Ushtrisë Çlirimtare të Kosovës, e as kundër Kosovës, por ndaj individëve.