Vrasja e Arjan Gosës në Kavajë -pasditen e kësaj të diele shënon një tragjedi të dyfishtë për familjen Gosa. Pak muaj më parë, më 29 mars të po këtij viti kësaj familje iu vra një tjetër djalë, ndërsa hetimet e policisë thonë se krimi i ndodhur sot ka lidhje pikërisht me atë ngjarje Arjan Gosa, u ekzekutua teksa po pinte kafe bashkë me të atin në një lokal në lagjen numër 1 në Kavajë . Rreth orës 18:30 një person ende i paidentifikuar e ka qëlluar me një plumb pistolete në kokë duke e lënë të vdekur në vend. Personi që e ka qëlluar është larguar në këmbë nga vendi i ngjarjes. Pista kryesore ku po heton policia është ajo e hakmarrjes nga ana e fisit Rexha. Në mars të këtij viti, vëllai i Arjanit, Edmond Gosa qëlloi disa herë me thikë shtetasin Altin Rexha, ndërsa ky i fundit iu kundërpërgjigj me armë zjarri duke përfunduar të dy të vdekur.