Dy dronë po fluturonin pranë oborrit presidencial ukrainas kur po zhvillonte vizitën e tij zyrtare kryeministri britanik, Keir Starmer. Ai u prit nga presidenti i Ukrainës, Voloymyr Zelensky, ndërsa në të njëjtën kohë dëgjoheshin alarmet ajrore që paralajmëronin sulme të mundshme nga ushtria ruse. “Skyneës” ka raportuar të enjten se njëri prej dronëve u rrëzua nga sistemet ajrore të mbrojtjes, ndërsa presidenti ukrainas Volodimir Zelensky tha se “edhe ne do t’i përshëndesim ata”. Kryeministri britanik në lidhje me situatën e krijuar është shprehur se kërcënimi me dronë nga ana e Rusisë “ishte edhe një mënyrë për t’i kujtuar atij se me çfarë po përballet Ukraina çdo ditë”. “Ne duhet të jemi plotësisht të qartë. Duhet të ketë një paqe të drejtë dhe të qëndrueshme që vjen nëpërmjet forcës”, ka deklaruar më tej Starmer. Edhe presidenti ukrainas është shprehur pro arritjes së paqes, por që ajo të garantohet nga fuqitë perëndimore.