Serbia ka ndalë me masa ndaj Kosovës. Presidenti serb, Aleksandar Vuçiç në një deklarim për media të premten në mbrëmje ka thënë se kërkon “heqjen e pasojave të veprimeve të njëanshme të Qeverisë së Kosovës”. Sipas një dokumenti që u është shpërndarë gazetarëve Serbia kërkon: shpalljen dhe mbajtjen e "zgjedhjeve lokale të lira dhe demokratike" në veriun e Kosovës, me pjesëmarrjen e misionit të Organizatës për Siguri dhe Bashkëpunim në Evropë (OSBE) dhe me mbikëqyrjen e Bashkimit Evropian. kthimin e serbëve në Drejtorinë Rajonale të Policisë së Kosovës për veriun dhe kthimin e gjyqtarëve dhe prokurorëve serbë në funksionet e tyre gjyqësore. tërheqjen e forcave speciale të Policisë së Kosovës nga "bazat dhe pikat e kontrollit të ndërtuara në mënyrë të paligjshme" në veriun e Kosovës. tërheqjen e Policisë nga të gjitha institucionet "të cilat nga viti 1999 deri në mbylljen e paligjshme në vitin 2024 ofronin shërbime vitale publike dhe administrative për qytetarët". formimin e Asociacionit të komunave me shumicë serbe zbatimin e menjëhershëm të “garancive të Bashkimit Evropian dhe Shteteve të Bashkuara nga 28 dhjetori i vitit 2022, dhe lirimin e menjëhershëm të të gjithë të burgosurve politikë" të arrestuar nga Policia e Kosovës, dhe kryerjen e pagesave me shërbimeve postare me valutën serbë, dinarë. Mes tjerash, Vuçiç ka bërë të ditur se do të nisë edhe një fushatë diplomatike për plotësimin e kërkesave e që është kusht i domosdoshëm për një përparim në procesin e dialogut mes Kosovës dhe Serbisë. “Ne duam t'i kthehemi gjithçkaje që është arritur në procesin e dialogut. Ne tregojmë se jemi më të përgjegjshëm se pala prishtinase dhe ata që janë garantuesit e asaj marrëdhënieje”, u shpreh Vuçiç.