Prokuroria e Shkodrës ka zbardhur ngjarjen e rëndë të ndodhur tre ditë më parë, ku nëna dyshohet se u vetëhodh bashkë me tre fëmijët e mitur në lumin Buna. Në datën 3 maj, ora 17:50, Prokuroria thotë se Erdgys Arazi u paraqit në komisariatin e Policisë së Shkodrës, ku ka kallëzuar largimin nga banesa të bashkëshortes së tij Almës, dhe tre fëmijët e tyre të mitur. Një ditë më parë, ka rezultuar se Alma, bashkë me fëmijët ka shkuar për të pirë kafe me kunatën e saj në lagjen “Iliria” Shkodër. Sipas Prokurorisë, ato kanë qëndruar rreth dy orë bashkë në kafë, dhe pasi kanë dalë jashtë, Alma ka deklaruar se do ta merrte vëllai i saj, pasi do shkonte një javë te shtëpia e tij që të qetësohej. Më pas është ndarë nga kunata, ka ecur në trotuarin e rrugës që të çon te “Ura e Bunës” së vjetër, në drejtim të “Kishës së Zojës”, Shkodër. Më pas, Alma së bashku me 3 fëmijët e saj, është kapur nga kamerat e sigurisë duke vazhduar rrugën në drejtim të “Urës së Bunës”, në anën perëndimore, ndërsa kunata e saj vazhdon nga ana lindore. Dalja nga lokali është në orën 20:10 të datës 02.05.2024.