Top Channel/ Ditë e zezë për libanezët! Forcat izraelite vijojnë bombardimet,humbin jetën 54 persona

Të paktën 54 persona u vranë dhe 56 u plagosën nga bombardimet izraelite në zonat e Libanit të dielën. Lajmi u konfirmua nga Ministria e Shëndetësisë libaneze. Që nga fillimi i luftës në Rripin e Gazës në tetor 2023, sulmet izraelite në Liban kanë marrë jetën e 3,243 personave, ndërsa të lënduarit arrijnë në 14,134. Për shkak të armiqësive midis ushtrisë izraelite dhe luftëtarëve të Hezbollahut, rreth 500,000 njerëz të zhvendosur kaluan kufirin dhe u strehuan në Siri. Bombardimet e Izraelit dhe pushtimi tokësor i Libanit kanë zhvendosur mbi një milion njerëz. Organizatat libaneze të ndihmës janë duke luftuar për të përballuar jetesën dhe për të siguruar numrin në rritje të atyre në nevojë. OJQ-të ndërkombëtare dhe vendore, krahas nismave private, janë bërë burimi kryesor i ndihmës për personat e zhvendosur. Shumica tani jetojnë në strehimore të përkohshme si shkolla, ose në shtëpi me qira, shpesh të pamobiluara, por disa mbeten në rrugë. Ndërsa Ministria e Shëndetësisë së Gazës njofton se 43,058 persona kanë vdekur nga sulmet izraelite që prej 7 tetorit të vitit të kaluar. Lufta në Gaza filloi kur militantët e udhëhequr nga Hamas hynë në jug të Izraelit më 7 tetor 2023 dhe vranë rreth 1200 njerëz, kryesisht civilë, dhe rrëmbyen rreth 250. Rreth 100 pengje janë ende brenda Gazës, ndërsa një e treta besohet të jenë të vdekur.