Një zjarr i përmasave të mëdha përfshiu një sipërfaqe me pisha dhe ullishte në fshatin Çërrilë të Mallakastrës shkrumboi mbi 20 hektarë pyll me pisha, duke shkaktuar dëme të konsiderueshme. Flakët kanë përfshirë gjithashtu mbi 1 mijë rrënjë ullinj, dy banesa të pabanuara dhe një banesë të banuar, si dhe dy stalla bagëtish. Për shkak të situatës së rënduar, Drejtori i Pergjithshem i Agjencisë kombëtare te mbrojtjes civile Haki Çako ka urdhëruar që, nëse është e nevojshme, të ndërmerren masa për evakuimin e banorëve të zonës. Mjete zjarrfikëse dhe forca të ushtrisë po punojnë në terren për shuarjen e zjarrit, por puna vështirësohet nga era që favorizon flakët. Gjatë së premtes forca të shumta nga terreni dhe avioni rumun “Spartan” me ndërhyrje nga ajri, u përqendruan në përpjekje për shuarjen e vatrave të zjarrit në Malin e Tomorrit. Autoritetet bënë të ditur se për shkak të terrenit dhe bimësisë së thatë që favorizon flakët, ndërhyrja ishte e vështirë, por situata është nën monitorim të vazhdueshëm dhe pa rrezik për zonat e banuara.