Diamanti i dytë më i madh i gjetur ndonjëherë – një gur rreth 2,492 karatësh – është zbuluar në Botsvana në një minierë në pronësi të firmës kanadeze “Lukara Dajmond”. Është gjetja më e madhe që nga diamanti Kulinan 3,106 karatësh, i gjetur në Afrikën e Jugut në vitin 1905 dhe i prerë në nëntë gurë të veçantë, shumë prej të cilëve janë në Kurorën mbretërore Britanike. Qeveria e Botsvanës tha se ishte diamanti më i madh i zbuluar ndonjëherë në shtetin e Afrikës jugore. Zbulimi i mëparshëm më i madh në Botsvana ishte një gur 1,758 karatësh i gjetur në të njëjtën minierë në vitin 2019. Botsvana është një nga prodhuesit më të mëdhenj në botë të diamanteve, duke zënë rreth 20% të prodhimit global. “Ne jemi të entuziazmuar për rikuperimin e këtij diamanti të jashtëzakonshëm 2,492 karat,” tha kreu i kompanisë Lukara Dajmond, Uilliam Lamb. Diamanti u zbulua me përdorimin e teknologjisë me rreze X, një teknikë që përdoret që nga viti 2017 për të identifikuar dhe ruajtur diamantet me vlerë të lartë në mënyrë që të mos thyhen gjatë proceseve të grimcimit.