Situata e javëve të fundit në parlament, me debate dhe akuza nga opozita për cënim të lirisë për të folur dhe asgjësim të shprehej të pakicës, ka prodhuar një takim mes të ngarkuarës me punë të ambasadës amerikane Nancy VanHorn dhe dy kryetarët e grupeve parlamentare Taulant Balla dhe Gazment Bardhi. Nga komenti i publikuar nga selia diplomatike e Ëashingtonit në Tiranë kuptohet qartësisht kërkesa për të dyja palët. Respektimi i fjalës në kuvendin e Shqipërisë. “E Ngarkuara me Punë Nancy VanHorn zhvilloi sot diskutime frytdhënëse me kryetarët e grupeve parlamentare, duke i angazhuar ata në planet e tyre për të përmbushur pritshmëritë e popullit shqiptar. Ajo theksoi se dialogu konstruktiv dhe liria e fjalës janë shtylla të institucioneve të forta politike. Ambasada e Shteteve të Bashkuara pret të bashkëpunojë me përfaqësues nga i gjithë spektri politik për t’i bërë vendet tona më të sigurta dhe më të begata”, deklaroi Ambasada Amerikane në Tiranë. Taulant Balla thotë se në qendër të bisedës ishte dialogu dhe agjenda legjislative e Kuvendit në kuadër të reformave shumëplanëshe, ku prioritete thelbësore spikasin përmbushja e detyrimeve të Shqipërisë në rrugën e anëtarësimit në Bashkimin Europian brenda këtij mandati. “Vlerësojmë mbi gjithçka rolin udhëheqës të Presidentit Trump dhe përpjekjet e SHBA për paqe dhe siguri kudo në botë. Javën e kaluar nën drejtimin e Kryeministrit Rama Shqipëria shënoi një moment vendimtar në rrugën drejt anëtarësimit në Bashkimin Europian, me çeljen e grupkapitullit të fundit të negociatave në Konferencën e 7-të Ndërqeveritare Shqipëri–BE në Bruksel”, shprehet kreu i grupit parlamentar të PS, Taulant Balla. Gjatë takimit thotë Taulant Balla diskutuam edhe për zgjerimin e bashkëpunimit mes Kuvendit të Shqipërisë dhe Kongresit si dhe mbi idenë e një Memorandumi Bashkëpunimi mes dy institucioneve ligjvënëse. Pas këtij takimi reagoi numri një i grupit parlamentar demokrat Gazment Bardhi. “Sot, gjatë takimit me të Ngarkuarën me Punë në Ambasadën e SHBA, znj. Nancy VanHorn, ndava qëndrimin tonë mbi luftën kundër krimit të organizuar dhe korrupsionit, si dhe regresin shqetësues të Shqipërisë në raport me standardet demokratike. Për fat të keq, gjatë këtyre 12 viteve, Shqipëria është drejtuar nga një qeveri partnere e krimit të organizuar dhe e karteleve të drogës”, shprehet Bardhi.