Të tjera detaje tronditëse janë zbardhur nga përdhunimi i Gisèle Pelicot nga burri i saj 71-vjeçar në Francë. Së fundmi Dominique Pelicot ka pranuar se ka përdhunuar bashkëshorten e tij në një pikë karburanti në mes të autostradës pasi e kishte droguar. Ai tha se ngjarja ndodhi pasi po ktheheshin nga pushimet, ndërsa shtoi se kjo ishte “fantazia” e tij. Pelicot, i cili akuzohet se i kishte vënë pilula gjumi në vaktet e gruas së tij dhe më pas ftoi dhjetëra burra që takoi në një faqe interneti për ta përdhunuar ndërsa ai filmonte veten, ka treguar se si e përdhunoi dikur në një pikë karburanti teksa po ktheheshin me makinë nga Ile de Re, në bregun e Atlantikut. “Ishte një fantazi e imja. Ne po ktheheshim nga Ile de Re dhe unë ndalova në një pikë karburanti dhe e përdhunova. Askush nuk na pa”, tha ndër të tjera 71-vjeçari. Nga ana e tjrtër, avokati i Giselle Pélicot, Stéphane Barbonet, i tha gjykatës së Avignon se i pandehuri e kishte çuar atë atje për t’ua “ofruar” shoferëve të kamionëve, por 71-vjeçari këmbëngul se “askush tjetër nuk ishte i përfshirë” në aktin e shëmtuar. Rasti i 72-vjeçares, e cili u sulmua vazhdimisht pa ndjenja, tronditi botën. Bashkëshorti i saj, Dominique, 71 vjeç, i cili e ka pranuar fajin, po gjykohet së bashku me 50 burra të tjerë të akuzuar për përdhunimin e saj. Gisèle Pélicot është vlerësuar gjerësisht për guximin e saj duke thënë se gjyqi duhet të mbahet publikisht dhe jo me dyer të mbyllura. Burrat që dyshohet se e përdhunuan ishin të moshës midis 26 dhe 73 vjeç kur u arrestuan dhe mes tyre ishte një këshilltar lokal, një gazetar, një ish-oficer policie, një roje burgu, një ushtar, një zjarrfikës dhe një nëpunës civil. Shumë ishin fqinjët e çiftit në qytetin e vogël Mazan, në Francën jugore.