Hetimet e autoriteteve italiane zbardhin detaje nga vrasja me thikë e studentit 23-vjeçar shqiptar, Hekuran Cumani, në parkingun e Departamentit të Matematikës dhe Shkencave Kompjuterike në Universitetin e Perugia. Sipas dëshmive paraprake, i riu shqiptar u përpoq të mbronte vëllain e tij më të vogël gjatë një përleshjeje mes dy grupe të rinjsh dhe u qëllua me thikë, duke ndërruar jetë në vend. Vëllai i Hekuranit, i cili gjithashtu u plagos, ka deklaruar se nuk pa se kush e goditi vëllain e tij, dhe e njëjta gjë u pohua edhe nga të rinjtë e tjerë të pranishëm. Hetuesit dyshojnë për një heshtje të qëllimshme nga dëshmitarët, pasi versionet e ngjarjes janë të paqarta dhe shpesh kontradiktore. Mësohet se përleshja ndodhi pas një nate në klub, ku dy grupe të rinjsh u konfliktuan për arsye ende të paqarta. Disa persona janë vënë nën hetim, përfshirë një 18-vjeçar me origjinë marokene, që jeton në Ponte San Giovanni, i cili akuzohet për kërcënime të rënda dhe mbajtje të mjetit të ftohtë – një thikë kuzhine që u soll në vendngjarje nga e dashura e tij, e cila gjithashtu është nën hetim. Një tjetër i ri me origjinë tuniziane po përballet me të njëjtat akuza. Ndërkohë, një roje sigurie, në klubin ku ishin të rinjtë, është akuzuar për plagosje, pasi dyshohet se, në përpjekje për të ndarë dy grupet, ka lënduar aksidentalisht vëllain e viktimës. Ai ka pranuar incidentin dhe ka pohuar se kishte çarmatosur një të ri që mbante thikë, e cila më pas u hodh në një makinë. Policia ka sekuestruar telefonat e të dyshuarve, dhe vijojnë hetimet për të zbardhur detaje të tjera mbi ngjarjen e rëndë.