Denoncimi publik i kryeministrit Edi Rama për ndërtimin pa leje të 10 kapanoneve në fshatin turistik të Thethit nxjerr në dritë detaje të reja mbi këto ndërtime, të cilat rezulton të jenë denoncuar edhe më herët nga autoritetet lokale, por prokuroria e qytetit verior nuk kishte nisur asnjë hetim. Top Channel disponon dosjen e Prokurorisë së Shkodrës, ku thuhet se kapanonet janë vendosur në pronën e shtetases Lene Prroni, një tokë e trashëguar brez pas brezi, pa dokumente pronësie të regjistruar, por sipas burimeve ka dyshime se kapanonet pa leje në Theth janë ndërtuar nga shtetasi Prek Kodra, një emër i njohur për drejtësinë shqiptare. Në vitin 2021, Prek Kodra, sipas një dokumenti të Njësisë Kundër Terrorizmit të Kosovës, kishte planifikuar të vriste me snajper kryeministrin e Kosovës, Albin Kurtin, dhe 2 politikanë të tjerë të njohur Kosovarë. Ai është shpallur në kërkim edhe nga SPAK në kuadër të dosjes “Metamorfoza”, me akuzë për disa ngjarje kriminale, si lidhjet me grupin Bajri në Shkodër, përfshirja në atentatet me pagesë me snajper. Vendimi për të mos nisur hetimet ndaj ndërtimeve pa leje në Theth është marrë nga prokurorja Elsa Gjeli, për të cilën kryeministri Rama tha se po përgatitet denoncimi. Vetë prokurorja Gjeli e argumentonte vendimin e saj me faktin se objektet në Theth janë pa themele. “Në lidhje me rastin konkret, nga këqyrja e vendit të ngjarjes provohet qartësisht se në pronën e shtetases Lene Prroni janë konstatuar vendosja e disa kontenjerëve, por të vendosura mbi pllaka guri. Këta kontenjerë nuk janë të vendosur mbi konstruksion betoni, sipas këqyrjes së vendit të ngjarjes. Si pasojë, këto punime kategorizohen si ndërhyrje të cilat nuk kanë domosdoshmëri për t’u pajisur me leje ndërtimi”, thuhet në dosjen e Prokurorisë. Por, kryeministri Rama publikoi pamje të ndërtesave, ku dukej betoni, duke e cilësuar këtë si skandali “Gjeli”, ndaj dhe vendosi t’ia kalojë shtetit të gjitha kabinat e Thethit. Nga ana e saj, Prokuroria e Shkodrës mori në mbrojtje prokuroren, duke thënë se ka vepruar në përputhje me ligjin. Elsa Gjoni rezulton të ketë mbaruar Shkollën e Magjistraturës një vit më parë dhe është emëruar si magjistrate e re në kryeqendrën e veriu