Kreu i PD, Sali Berisha është bërë viral në rrjet gjatë fjalës së tij në konferencën me gazetarët. Berisha ngatërroi memen që qarkullon në rrjet me një pikë të Kodit të ri Penal. Në fund të konferencës bashkëpunëtorët e tij i dhanë një letër me një shënim, por kreu i PD nuk bëri ndonjë sqarim të mëtejshëm, duke mbyllur konferencën për mediat. “A mund të imagjinoni tani, më thuaj mua? Ju jeni me fat se jeni të martuara. Nëse do kishit qenë beqare nënat tuaja do mund të shkonit, për ndjenjat më të dashura për ju e të ardhmen tuaj, mund të shkonin në burg për 3 vite nëse guxonin t’u thoshin ‘bijë e nënës koha është për t’u martuar, nëna do të shohë çift’, si çdo nënë që e ka për djalin dhe për vajzën. E imagjinoni ju ku shkon ky dhe kjo quhet martesë me zor. Është e shkruar, e kam këtu nenin. Nëse thotë ‘I thuhet po të ikën koha’, po sa herë të kanë thënë ty po të ikën koha. I ke në burg ata, gjyshërit jo, por nëna dhe baba përfundojnë në burg po e morën vesh. Kjo tregon maninë e turpshme, të neveritshme, se si të burgosësh të tjerët. A mund të vendoset një nen tillë dhe sidomos thotë kur “kur në një tavolinë”, por në tavolinë bëhen këto, “kur në një tavolinë dreke apo darke miqësore, prindi i thotë vajzës se po të ikën koha, mos e zgjat më shumë”. Këto ishin aktet e martesës me zor, por është mendësi e paimagjinueshme. Por në Shqipëri martesa me zor nuk ekziston. Ky është Kodi”, tha Berisha.