Gjykata e Ferizajt ka dhënë masën arrest me burg për 40 ditë për Gëzim Çelën, i ashtuquajturi baroni i drogës që u arrestua të premten në Prishtinë. Ish-punonjësi i policisë shqiptare në arrati, i shndërruar në kontaktin kryesor të shpërndarjes së heroinës në Shqipëri si dhe autor i kalimit të dhjetëra kilogramëve kokainë në Kosovë, kishte gjetur strehim në një fshat të Vitisë në Kosovë ndërkohë që në Shqipëri u shpall në kërkim në gusht të këtij viti pasi nuk mundi te vihej dot në pranga gjatë operacionit “Flakë në det”. Ndaj Celës rëndojnë veprat penale trafik droge, prodhim dhe mbajtje pa leje e armëve luftarake dhe municionit, akuza për të cilat është dënuar me dënuar me 19 vjet e 9 muaj burg. Policia shqiptare kishte zbuluar se ai dhe grupi i tij, i ndihmuar nga shefi i komisariatit të Kurbinit, Dritan Metaj, trafikonte kanabis nga zona e Fushë Kuqes drejt detit Adriatik ku në një velierë e shkëmbente kanabisin me kokainë. Emri i Gëzim Çelës është ndër të parët e përmendur si trafikant droge në Shqipëri pasi këtë aktivitet e ka nisur në vitet ’90-ta. Më herët ai ka qenë i arrestuar për shfrytëzim prostitucioni dhe trafik ndërkombëtar droge.