Një apartament në një pallat në lagjen e vjetër të Bulqizës u përfshi nga zjarri këtë mëngjes duke i shkaktuar plagë të rënda një të moshuari. Kanë qenë fqinjët e Xhevdet Carës rreth 70-vjeç, ata që kanë parë tymin të dilnin nga dritarja e apartamentit në katin e parë të pallatit dhe kanë njoftuar menjëherë zjarrfikësen e cila ka shkuar në vendngjarje për fikjen e zjarrit, duke bërë të mundur edhe nxjerrjen e të moshuarit nga banesa. Pavarësisht dhënies së ndihmës së shpejtë në spitalin e Bulqizës ai nuk mundi t’i mbijetonte plagëve të zjarrit dhe ndërroi jetë. Dyshohet se flakët i ka shkaktuar një rezistencë e lënë ndezur gjatë natës, që i moshuar e përdorte për ngrohje. Xhevdet Cara jetonte vetëm me bashkëshorten, e cila nuk ndodhej në banesë në momentin kur ra zjarri. Një grup hetimor në vendngjarje po heton për zbardhjen e plotë të shkaqeve dhe rrethanave të ngjarjes.