Një datë për takimin e tyre nuk është caktuar ende, megjithatë rrugëtimi i presidentit rus Vladimir Putin drejt Budapestin për takimin me shefin e Shtëpisë së Bardhë, Donald Trump, i kishte që në fillim disa pengesa. Kur Putini udhëtoi drejt Alaskës për samitin e Anchorage në muajin gusht, SHBA-ja dha një leje të posacme për avionin e tij presidencial- Ilyushin Il-96 , i njohur ndryshe si "Kremlini Fluturues" që ka katër motorë dhe është i mbushur me sisteme mbrojtëse. Avionëve rusë u ndalohet hyrja në hapësirën ajrore të SHBA-së, e kjo gjë vlen edhe për hapësirën ajrore të BE-së. Në mënyrë që të udhëtojë drejt Budapestit, atij i nevojitet një përjashtim i posaçëm për të fluturuar mbi një shtet anëtar të bllokut. Këtë gjë vendosi ta bëjë Bullgaria. Sofja zyrtarë sinjalizoi, se do të lejojë fluturimin e presidentit rus përmes hapësirës së saj ajrore drejt kryeqytetit hungarez. "Nëse bëhen përpjekje për arritjen e paqes, dhe nëse kushti për këtë është, që të ketë një takim, atëherë është logjike që të mundësohet zhvillimi i këtij takimi ashtu siç është e udhës", është shprehur ministri i Jashtëm bullgar Georg Georgiev, sipas një njoftimi të radios shtetërore bullgare në kuadrin e takimit të këshillit të ministrave të BE-së në Luksemburg. Një itinerar i mundshëm fluturimi nga Moska për në Budapest kalon mbi Detin e Zi, mbi Bullgari dhe Serbi. Hapësira ajrore e Bullgarisë si vend anëtar në BE pas fillimit të luftës sulmuese të Rusisë ndaj Ukrainës është e mbyllur për avionët rusë. Itinerare të tjera të mundshme janë në veri përmes Bjellorusisë dhe Polonisë ose Detit Baltik, Gjermanisë dhe Çekisë. Shefat e diplomacive ruse dhe amerikane Sergej Lavrov dhe Marco Rubio, kanë diskutuar tashmë mbi përgatitjen e një takimi të mundshëm të presidentëve lidhur me luftën në Ukrainë, e duket se është biseduar sesi mund të zbatohen konkretikisht ato për të cilat u ra dakord gjatë telefonatës se Trump dhe Putin të enjten e kaluar.