Sekretari i Pergjithshem i LSI, Endrit Braimllari në një konferencë për mediat ka akuzuar ministrin e Mbrojtjes, Niko Peleshi dhe kryebashkaikun Sotiraq Filo se në kundërshtim me ligjin dhe në konflikt interesi po përdorin institucionet në shërbim të fushatës elektorale. "Unë e kuptoj ankthin dhe makthin e Niko Peleshit, sepse jo i rrezikohet, por nuk e merr dot mandatin e tij në Qarkun e Korçës, se këtë e kam thënë më përpara, se nuk e merr për shkak të largimit të socialistëve të ndershëm, por kam një thirrje për këta drejtues: Të ndalin abuzimet sepse janë të gjithë për të shkuar në burg. Si mundet në një qytet që një drejtor i një institucioni të rëndësishëm si ai i Ndërmarrjes së Shërbimeve Publike të jetë njëkohësisht edhe administrator i një guroreje. Vetëm këtu mund të ndodhë. Pse ndodh kjo gjë? Sepse janë të frymëzuar nga Niko Peleshi. Kjo ndodh sepse Niko Peleshi është ndier mbreti i Korçës. Kjo ndodh sepse Niko Peleshi thotë: Unë zotëroj gjithçka në Korçë. Kjo ka ndodhur sepse Niko Peleshi gjithmonë ka pasur një marrëveshje për të mbrojtur interesat e tij personale, por nuk ka marrëveshje", tha Braimllari.