Paraditen e të premtes disa prokurorë të SPAK do të paraqiten përpara Këshillit për Rregulloren dhe Imunitetin në Kuvend për të kërkuar autorizimin për arrestimin e Belinda Ballukut. Burime nga Kuvendi tregojnë për Top Channel se, krahas prokurorit të çështjes, Dritan Prençi, në përfaqësim do të jenë edhe kreu i ri i SPAK, Klodian Braho, si dhe prokurorja Dorina Bejko. Kjo nënkupton se ditën e parë në detyrë, Braho do ta nisë me një përballje në kuvend, duke argumentuar arsyet për arrestimin e Ballukut. Në relacionin prej 32 faqesh të siguruar nga Top Channel, Spak argumenton në kërkesën për heqjen e imunitetit se ekziston rreziku i përsëritjes së veprave penale. Sipas Prokurorisë së Posaçme, Balluku dyshohet për ndërhyrje në të paktën 11 procedura tenderimi me vlerë shumë të lartë financiare, si dhe për ushtrim presioni ndaj një vartëseje, edhe pasi ishte marrë e pandehur. Në dokumentin e dërguar në Kuvend, SPAK rendit disa prej projekteve kryesore për të cilat po zhvillohet hetim, përfshirë tunelin e Llogarasë, lotet e Unazës së Madhe, si dhe tendera të tjerë të rëndësishëm infrastrukture. Një orë para mbledhjes së Këshillit për Rregulloren dhe Imunitetin, do të mblidhet Sekretariati i Etikës. Socialistët kanë kërkuar dënimin e 29 deputetëve demokratë për tensionin në kuvend gjatë seancës së të enjtes, por Top Channel mëson se asnjë prej ligjvënësve opozitarë nuk rrezikon pjesëmarrjen në mbledhjen për imunitetin e Ballukut, pasi pezullimet e Sekretariatit të Etikës vlejnë vetëm për komisionet parlamentare dhe për seancat e kuvendit, e jo për mbledhjen e Këshillit për Rregulloren dhe Imunitetin. Ndërkaq, Gjykata e Posaçme e Apelit la në fuqi masën e sigurisë për ndalimin e daljes jashtë shtetit për Ballukun. Apeli nuk ka shqyrtuar ende masën e pezullimit nga detyra, duke pritur vendimin e Gjykatës Kushtetuese. Edhe për dy të pandehurit e tjerë, Erald Elezi dhe Gentian Gjyli, Apeli nuk e ndryshoi vendimin ndaj tyre.